63 film labur aurkeztu dira Kimuak 2016ra

Aukeraketa ekainaren 13an jakinaraziko da

Atzo, maiatzaren 31ean itxi zen Kimuaken 2016eko ediziora film laburrak aurkezteko epea eta 63 izan dira izena eman duten lanak.

Eusko Jaurlaritzako Kultura Sailak Etxepare Euskal Institutuaren bitartez sustatzen duen Kimuak egitasmoak, Euskadiko Filmategia Fundazioak kudeatua, Euskal Autonomia Erkidegoan zuzendu edo ekoiztutako film laburren sustapena eta banaketa du helburu.

Aurkeztutako lanak aztertu eta epaitzeko, zinema eta ikus-entzunezkoen munduko bost profesional eta adituez osatutako hautespen batzorde independente bat eratu da.

Aurtengo epaimahaia honako kideek osatzen dute:
 

• Amaia Serrulla, Donostia Zinemaldiko Hautespen-batzordeko kidea.
• Carmen Chávez, Cortosfera aldizkariko Proiektu Zuzendaria.
• José Manuel Zamora, Abycine - Albaceteko Nazioarteko Zinema Jaialdiko Zuzendaria.
• Mari Fran Machín, ARTIUM Arte Garaikideko Euskal Zentro-Museoko Hezkuntza eta Jardueren Koordinatzailea.
• Rosa Zufía, kazetaria eta EITB Kultura-Transit telebista saioko Zuzendaria.

Epaimahaia datorren astelehena, ekainaren 13an bilduko da eta egun horretan bertan emango da jakitera aukeraketa berria.